# वर्सोवा–वांद्रे सागरी सेतू बहु प्रतिक्षेत असलेला प्रकल्प १७ मे २०२८ पर्यंत पूर्ण होणार!

*वर्सोवा–वांद्रे सागरी सेतू बहु प्रतिक्षेत असलेला प्रकल्प १७ मे २०२८ पर्यंत पूर्ण होणार!*

माहिती अधिकार कार्यकर्ते अनिल गलगली यांच्या तक्रारीवर एमएसआरडीसीची ग्वाही; प्रकल्पाला १,४२१ दिवसांची मुदतवाढ

**मुंबई :** वर्सोवा–वांद्रे सागरी सेतू प्रकल्पाचे काम १७ मे २०२८ पर्यंत पूर्ण करण्याची ग्वाही महाराष्ट्र राज्य रस्ते विकास महामंडळाने (एमएसआरडीसी) दिली आहे. माहिती अधिकार कार्यकर्ते अनिल गलगली यांनी प्रकल्पातील विलंब, कंत्राटदाराची जबाबदारी आणि लिक्विडेटेड डॅमेजेस (Liquidated Damages – LD) आकारण्याबाबत तक्रार व निवेदन सादर केले होते. त्यावर उत्तर देताना महामंडळाने प्रकल्पाच्या सुधारित पूर्णत्वाच्या तारखेसह विलंबाची कारणे स्पष्ट केली आहेत.

अनिल गलगली यांनी १० फेब्रुवारी २०२६ रोजी माहिती अधिकारांतर्गत अर्ज दाखल करून प्रकल्पातील विलंबाची कारणे, त्यासाठी जबाबदार असलेल्या घटकांची निश्चिती आणि कंत्राटदारावर दंडात्मक कारवाईबाबत माहिती मागितली होती. त्यानंतर २५ ऑगस्ट २०२६ रोजी त्यांनी यासंदर्भात पुन्हा निवेदन सादर केले. या निवेदनाच्या अनुषंगाने एमएसआरडीसीने लेखी स्पष्टीकरण दिले आहे.

### १,४२१ दिवसांची मुदतवाढ

एमएसआरडीसीच्या पत्रानुसार, प्रकल्पाच्या मूळ करारानुसार काम पूर्ण करण्याची तारीख २१ जून २०२४ होती. मात्र, प्रकल्पाच्या अंमलबजावणीदरम्यान विविध कारणांमुळे १,४२१ दिवसांची मुदतवाढ मंजूर करण्यात आली असून, आता प्रकल्प पूर्ण करण्याची सुधारित तारीख **१७ मे २०२८** निश्चित करण्यात आली आहे.

### विलंबाची चार प्रमुख कारणे

महामंडळाने प्रकल्पातील विलंबासाठी पुढील कारणांचा उल्लेख केला आहे.

– **कास्टिंग यार्डसाठी जागा उपलब्ध होण्यास विलंब :** २५० दिवस.

– **कोविड-१९ महामारी आणि टाळेबंदी :** १८० दिवस.

– **जॉइंट व्हेंचरमधील पुनर्रचना व कायदेशीर बदल :** ४८३ दिवस.

– **कामाच्या व्याप्तीतील बदल :** ५०८ दिवस. यामध्ये स्थानिक कोळी बांधवांच्या मागण्यांनुसार नेव्हिगेशन स्पॅन व आखणीतील बदल, मालाड येथील कास्टिंग यार्डचे स्थलांतर आणि अतिरिक्त जोडरस्त्यांचा समावेश आहे.

या कारणांचा विचार करून तांत्रिक समिती आणि सल्लागारांच्या तपासणीनंतर मुदतवाढ मंजूर करण्यात आल्याचे एमएसआरडीसीने स्पष्ट केले आहे.

### कंत्राटदारावर सध्या दंड आकारता येणार नाही

प्रकल्पाचे कंत्राट मे. बी. वर्ल्ड अपको जेव्ही यांच्याकडे आहे. मंजूर मुदतवाढीच्या पार्श्वभूमीवर सध्याच्या परिस्थितीत कंत्राटदारावर लिक्विडेटेड डॅमेजेस (LD) आकारणे किंवा वसूल करणे करारानुसार लागू होत नसल्याचे महामंडळाने आपल्या उत्तरात नमूद केले आहे.

मात्र, भविष्यात कंत्राटदाराच्या निष्काळजीपणामुळे किंवा त्याच्या नियंत्रणातील कारणांमुळे प्रकल्पाच्या कामात विलंब झाल्यास करारातील अटींनुसार कठोर दंडात्मक कारवाई करून LD वसूल करण्यात येतील, असेही एमएसआरडीसीने स्पष्ट केले आहे.

### प्रकल्पाच्या खर्चातही वाढ

कामाच्या व्याप्तीतील बदल, जीएसटी दरातील वाढ आणि अतिरिक्त जोडरस्त्यांमुळे प्रकल्पाच्या सुधारित खर्चात वाढ झाल्याचे महामंडळाने म्हटले आहे. पत्रानुसार, प्रकल्पाची सुधारित किंमत सुमारे **₹१८,१२०.१६ कोटी** झाली आहे. यासंदर्भातील माहिती सार्वजनिक बांधकाम विभागाच्या २५ जुलै २०२४ रोजीच्या शासन निर्णयाच्या आधारे सार्वजनिक संकेतस्थळावर उपलब्ध असल्याचेही पत्रात नमूद आहे.

### अनिल गलगली यांची मागणी : प्रकल्प वेळेत पूर्ण करा

वर्सोवा–वांद्रे सागरी सेतू हा मुंबईच्या वाहतूक व्यवस्थेच्या दृष्टीने महत्त्वाचा पायाभूत सुविधा प्रकल्प आहे. त्यामुळे प्रकल्पातील विलंबाची कारणे स्पष्ट करणे, वाढीव खर्चाबाबत पारदर्शकता राखणे आणि कंत्राटदाराची जबाबदारी निश्चित करणे आवश्यक आहे.

अनिल गलगली यांच्या तक्रारीनंतर एमएसआरडीसीने दिलेल्या उत्तरातून प्रकल्पाची सुधारित पूर्णत्वाची तारीख १७ मे २०२८ असल्याचे स्पष्ट झाले आहे. आता या निर्धारित मुदतीत प्रकल्प पूर्ण करण्याची जबाबदारी महामंडळावर असून, सार्वजनिक निधीचा योग्य वापर आणि कामाच्या प्रगतीवर प्रभावी देखरेख ठेवणे महत्त्वाचे ठरणार आहे.

**— समाप्त —**