गोरेगावमध्ये म्हाडाच्या ६००० चौ.मी. जमिनीवर बेकायदेशीर कब्जा; ७ वर्षांनंतरही कारवाई नाही

मुंबई – महाराष्ट्र गृहनिर्माण आणि क्षेत्र विकास प्राधिकरण (MHADA)च्या मालकीच्या गोरेगाव (पश्चिम) येथील सुमारे ६००० चौरस मीटर जागेवर बेकायदेशीर कब्जा झाल्याचा गंभीर प्रकार समोर आला आहे. स्टेलर वर्ल्ड स्कूलसमोरील ही जमीन लीज रद्द होऊन तब्बल ७ वर्षे उलटूनही अद्याप ट्रस्टकडून ताब्यातच असल्याचे उघड झाले आहे.

मिळालेल्या माहितीनुसार, ही जमीन मूळतः शैक्षणिक उद्देशांसाठी देण्यात आली होती. मात्र संबंधित ट्रस्टने नियमांचे उल्लंघन करून या जमिनीचा वापर इतर कारणांसाठी केल्याचा आरोप आहे. २०१९ मध्ये लीज रद्द करण्यात आली होती, तरीही प्रत्यक्ष ताबा अजूनही परत मिळालेला नाही.

यासंदर्भात गृहनिर्माण विभागातील अधिकाऱ्यांनी दिलेल्या आदेशांकडेही दुर्लक्ष झाल्याचे दिसून येत आहे. त्यामुळे प्रशासनाच्या कार्यक्षमतेवर प्रश्नचिन्ह निर्माण झाले आहे. काही अधिकाऱ्यांवरही संशय व्यक्त केला जात असून, या प्रकरणात सखोल चौकशीची मागणी जोर धरत आहे.

तज्ञांच्या मते, जर या प्रकरणाची निष्पक्ष चौकशी (SIT) करण्यात आली, तर अनेक वरिष्ठ अधिकाऱ्यांचे नाव समोर येऊ शकते. तसेच शासनाला कोट्यवधी रुपयांचा महसूल तोटा झाल्याची शक्यता व्यक्त केली जात आहे.

दरम्यान, स्थानिक नागरिकांनी आणि सामाजिक कार्यकर्त्यांनी या प्रकरणात तातडीने कारवाई करण्याची मागणी केली असून, दोषींवर कठोर पावले उचलण्याची अपेक्षा व्यक्त केली आहे